Ni Fhen M.

San-o pa abrehan an syahan nga semestre
sumuring ka ha ak, “Di’ ulang it babaye.”
Asya nga ginsari mo uyaban an at mga kaklase,
basta gud dumara[ga]on, ha pagtikang han klase:

Ha blackboard han Ingles titser ta, hi Ma’am Sabio,
imo sinuratan, pananglitan, hi Diyang –
lawas nga kurte-botelya, an pantasya han bayan –
hin im Can we date? Ug mga Me loves you.

Panbayad ha encoding, panbayad ha printing
para unta ha project han Literature nga subject,
inulipad an kwarta, gumasa an im wallet
san-o nakarawat an tam-is/apdo nga tamdo.

Nag-inaram kamo ha ligid han kwarto:
pananglitan inadman mo an paghapohap han iya tudlo,
samtang inadman niya an di hugot nga pagkapot –
huring ha ak ni Diyang, “Bubul-iwan ko man gihap.”

Napiksian, nasamaran, an im mahumok nga dughan
nagtangis ka pade, an pagtangis nga hilarom
tubtob waray mahikit-an an im lambong ha room
tima ka bulagan han im ilo nga inggis.

Ini nga semestre san-o pa man mahuman
sugad han im kahulog ha mga kamot ni Diyang,
lagpak bagsak ka pade ha mga asignatura
Ano adto an im siring? Di ulang an kababayin-an?